Detaje të reja dhe tronditëse kanë dalë në dritë lidhur me tragjedinë që goditi një familje shqiptare në Itali, ku katër anëtarë të saj prindërit dhe dy fëmijët, humbën jetën si pasojë e helmimit nga gazi. Sipas mediave italiane, që citojnë burime zyrtare, ngjarja dyshohet se ka ndodhur në orët e mbrëmjes, ndërsa identiteti i viktimave ende nuk është bërë publik.
Ekipet e emergjencës, pasi hynë në banesë, gjetën tryezën e ngrënies të përgatitur, një detaj që lë të kuptohet se familja ishte gati të ulej për darkë në momentin kur ndodhi tragjedia.
Alarmin e ka dhënë vëllai i kryefamiljarit, i cili, i shqetësuar nga mungesa e kontaktit, njoftoi karabinierët. Pas mbërritjes në banesën trekatëshe dhe përpjekjeve të pasuksesshme për të marrë përgjigje, forcat e rendit u detyruan të hapin derën me forcë.
Pamja brenda banesës ishte dramatike: katër persona të shtrirë pa shenja jete. Gjatë ndërhyrjes, një familjar tjetër humbi ndjenjat për shkak të ekspozimit ndaj monoksidit të karbonit, por u shpëtua falë reagimit të shpejtë të karabinierëve, të cilët arritën të largoheshin në kohë dhe të kërkonin ndihmë mjekësore. Ai u transportua me urgjencë drejt spitalit të Cisanellos për trajtim.
Në vendin e ngjarjes mbërriti edhe kryebashkiaku i Porcarit, Leonardo Fornaciari, i cili shprehu dhimbjen dhe tronditjen e thellë për këtë ngjarje të rëndë, duke theksuar se tragjedia ka prekur jo vetëm familjen, por edhe gjithë komunitetin pranë qytetit të Luccës.
