Një person i dyshuar për grabitje është paraqitur sot në Gjykatën Magjistrale të shkallës së parë, pasi akuzohet për mbi 30 vepra penale të kryera në zona të ndryshme të Anglisë.
Sipas raportimeve të Kent Online, 14 nga këto vepra dyshohet se kanë ndodhur në qarkun Kent, konkretisht në Sevenoaks, Tonbridge dhe Ashford. I dyshuari është identifikuar si Gledis Uka, 29 vjeç, pa adresë të fiksuar.
Uka është akuzuar të shtunën, më 31 janar, për 31 raste vjedhjeje me thyerje dhe dy akuza për tentativë vjedhjeje me thyerje. Ai u paraqit sot në Gjykatën e Magjistraturës në Sevenoaks, ku gjykata vendosi ta lërë në paraburgim.
Sipas hetimeve, në shumë prej rasteve pronat e grabitura kishin dritare ose dyer xhami të thyera. Dyshohet se një burrë i maskuar ka hyrë në banesa, duke vjedhur bizhuteri dhe para.
I dyshuari u arrestua të premten në Essex nga oficerët e Policisë së Kentit. Ai pritet të dalë sërish përpara drejtësisë të hënën, më 2 mars, në Gjykatën e Kurorës në Maidstone.
Veprat e tjera të dyshuara përfshijnë grabitje të ndodhura në prona në qarqet Berkshire, Bristol, Buckinghamshire, Essex, Suffolk dhe Surrey, ndërsa hetimet vijojnë.
