Me ardhjen e Álvaro Arbeloa në stolin e Real Madridit, ka pasur ndryshime të dukshme, por më i spikaturi lidhet me mënyrën si po trajtohet Vinicius Jr. Sipas MARCA, në gjashtë ndeshjet e para nën drejtimin e trajnerit të ri, braziliani nuk ka humbur asnjë minutë, duke u kthyer në figurë të pandashme të repartit ofensiv.
Ndërkohë që Arbeloa ka menaxhuar lodhjen e yjeve të tjerë si Jude Bellingham, Thibaut Courtois dhe Kylian Mbappé (që munguan në udhëtimin drejt Albacete), Vinicius u aktivizua plot 90 minuta edhe në një ndeshje të vështirë në Copa del Rey. Edhe kur rezultati ishte i sigurt, trajneri nuk e zëvendësoi.
Kjo seri prej 6 ndeshjesh radhazi pa zëvendësim nuk ishte parë që nga viti 2023, në kohën e Carlo Ancelotti.
Tani, ai do të mungojë në ndeshjen e ardhshme ndaj Valencias për shkak të pezullimit, çka i sjell Arbeloas një sfidë taktike: pa Vinicius dhe pa Bellinghamin e dëmtuar, trajneri duhet të rishikojë zgjedhjet në sulm. Pritet që Rodrygo të marrë rolin në krahun e majtë, ku prej kohësh ka shprehur dëshirën të luajë.
