Milan ka hyrë papritur në garë për mbrojtësin e Chelsea, Axel Disasi, me synimin për të prishur marrëveshjen që dukej thuajse e mbyllur mes lojtarit dhe West Ham United.
Sipas “insider”-it Nicolò Schira, kuqezinjtë po tentojnë të shfrytëzojnë marrëdhënien e mirë me drejtuesit e klubit londinez për ta bindur francezin të zgjedhë San Siro.
Situata është bërë e nxehtë sepse të mërkurën Disasi raportohet se kishte rënë dakord për kushtet personale me West Ham United, dhe transferimi drejt “Hammers” dukej vetëm çështje kohe. Por ndërhyrja e Milan e ka hedhur gjithçka në pikëpyetje: aktualisht Chelsea dhe “Rossoneri” janë në negociata direkte për të gjetur një formulë marrëveshjeje që i kënaq të dyja palët dhe i lejon italianët të kalojnë rivalët e Premier League.
Gjithçka pritet të varet nga marrëveshja mes klubeve për termat në ditët në vijim, si edhe nga fakti nëse Disasi është i gatshëm të rishikojë vendimin dhe të kalojë në Serie A.
Vlen të theksohet se këtë sezon, mbrojtësi francez nuk ka zhvilluar asnjë ndeshje me londinezët, ndërsa Transfermarkt e vlerëson atë rreth 15 milionë euro.
