Lajm i madh për Sevilla FC: Sergio Ramos ka arritur një marrëveshje parimore me grupin kryesor të aksionarëve të klubit andaluzian për blerjen e Sevillas. Lajmi raportohet nga Manolo Aguilar në Carrusel Deportivo, i cili shton se në projekt do të përfshihet edhe Martin Ink, figurë kyçe e fondit Five Eleven Capital.
Pas kësaj marrëveshjeje fillestare, hapet një periudhë ekskluziviteti, gjatë së cilës Ramos dhe partnerët e tij do të analizojnë financat e klubit (due diligence), me synimin për të arritur një marrëveshje përfundimtare. Edhe pse procesi pritet të zgjasë disa muaj, fakti që ekziston tashmë një dakordësi parimore e bën këtë hap tejet domethënës.
Sipas gazetarit Miguel Ángel Chazarri, oferta fillestare kap vlerën e rreth 450 milionë eurove për blerjen e klubit ku Ramos ka luajtur në dy periudha të ndryshme të karrierës së tij. Mbrojtësi nga Camas ishte pjesë e Sevillas nga 2003 deri në 2005, përpara se të transferohej te Real Madrid, ndërsa pas dy sezoneve te Paris Saint-Germain, ai u rikthye në klubin e fëmijërisë në sezonin 2023/24.
Manolo Aguilar raportoi gjithashtu se më 15 janar ishte zhvilluar një takim i gjatë mbi dy orë mes Sergio Ramos, Pérez Solano dhe aksionarëve të klubit, ku u prezantua projekti dhe oferta financiare. Përshtypjet pas takimit ishin shumë pozitive dhe, me kalimin e ditëve, kjo ndjesi u konfirmua, duke çuar në arritjen e marrëveshjes parimore.
Situata e vështirë institucionale e Sevillas, e shoqëruar me sezone zhgënjyese dhe rezultate nën pritshmëri, duket se ka shtyrë Ramosin të marrë iniciativën. Menaxhimi aktual i klubit është nën presion dhe ardhja e tij si investitor kryesor mund të sjellë edhe largimin e Del Nido Jr. nga drejtimi. Tashmë, gjithçka varet nga periudha e ekskluzivitetit, e cila do të përfundojë pas disa muajsh dhe do të përcaktojë fatin përfundimtar të këtij operacioni historik.
