Atalanta ka siguruar një fitore të rëndësishme në javën e 22-të të Serie A, duke mposhtur Parmën me shifrat e pastra 4-0 në Bergamo. Tri pikët i japin skuadrës një shtysë të fortë në garën për zonën europiane, duke e çuar kuotën e pikëve në 35.
Ndeshja u zhbllokua në minutën e 15-të, kur Scamacca realizoi saktë nga pika e bardhë e penalltisë, pas faullit të shkaktuar nga Zalewski. Pas golit të avantazhit, Atalanta mori kontrollin e lojës dhe shtoi presionin ndaj kundërshtarit.
Epërsia u dyfishua në minutën e 24-t, kur de Roon përfitoi nga një aksion i ndërtuar bukur nga De Ketelaere, duke e dërguar topin në rrjetë dhe duke e bërë edhe më të vështirë misionin e Parmës.
Në pjesën e dytë, skuadra mike nuk arriti të reagojë, ndërsa Atalanta vijoi të luajë me qetësi dhe organizim. Në minutën e 73-të, Raspadori shënoi golin e tij të parë me fanellën zikaltër, pas asistit të Krstovic, i cili kishte hyrë si zëvendësues.
Krstovic u kthye në protagonist edhe në minutën e 92-të, duke realizuar golin e katërt dhe duke vulosur përfundimisht fitoren e thellë të Atalantës.
Me këtë sukses, skuadra e drejtuar nga Palladino forcon pozitat në renditje dhe rrit ndjeshëm shpresat për një kualifikim europian.
Në krahun tjetër, Parma mbetet me 23 pikë dhe ka nevojë për një reagim të shpejtë në javët në vijim për të shmangur rrezikun e rënies nga kategoria.
