Victor Montagliani, presidenti i CONCACAF-it, ka raportuar një pagë total prej mbi 3 milionë dollarësh për vitin 2024, pavarësisht se sipas dokumenteve tatimore, ai ka deklaruar vetëm pesë orë pune në javë. Këto informacione, të nxjerra nga deklaratat e IRS, kanë shkaktuar debat dhe shqetësime në botën e sportit. Montagalani ka fituar 2.1 milionë dollarë si pagë bazë, së bashku me 893.750 dollarë në forma bonusesh dhe stimujsh financiarë, si dhe 15.780 dollarë nga pagesa të shtyra ose skema pensioni. Ai konsiderohet zyrtari më i paguar brenda strukturës së CONCACAF-it.
Në kontrast, sekretari i përgjithshëm i CONCACAF-it, Philippe Moggio, ka pasur një pagë bazë prej 1.569.600 dollarësh, duke e çuar totalin e tij mbi 2.4 milionë dollarë për një angazhim prej 40 orësh në javë. Organizata është regjistruar si jofitimprurëse në Shtetet e Bashkuara, duke i dhënë asaj një përjashtim nga taksat mbi fitimin. Profesori i së drejtës tatimore, Richard Schmalbeck, e ka sfiduar saktësinë e orëve të punës të Montagliani-t, duke sugjeruar se ato mund të jenë më shumë formale se reale.
Dokumentet që tregojnë këto shifra janë përgatitur nga kompania BDO dhe janë nënshkruar nga drejtori financiar Alejandro Lesende, ndërsa CONCACAF ka refuzuar të ofrojë ndonjë koment mbi këto të dhëna. Montagliani, i cili është zgjedhur president në vitin 2016, gjithashtu merr rreth 300 mijë dollarë në vit si anëtar i Këshillit të FIFA-s. Ndërkohë, raportet tregojnë se presidenti i FIFA-s, Gianni Infantino, ka pasur një fitim prej mbi 6 milionë dollarësh në vitin 2024. Kjo situatë ka ngritur pyetje në lidhje me transparencën dhe etikën në organizatat sportive, veçanërisht në lidhje me pagat e zyrtarëve të lartë.
