Elektricisti që shfaqet në foto quhet Leksi Lazi. Ai u ngjit në majë të një shtylle rreth 15 metra të lartë, duke vënë në rrezik jetën e tij mes stuhisë dhe reshjeve të dendura të dëborës, për të riparuar defektet në rrjetin elektrik.
Pavarësisht kushteve ekstreme, ai vijoi me përkushtim detyrën e tij, pa u tërhequr, me qëllim garantimin e furnizimit me energji elektrike për komunitetin. Një shembull i qartë përgjegjësie dhe sakrifice, që shpesh kalon pa u vënë re.
Moti i keq që përfshiu Kolonjën, në qarkun e Korçës, shkaktoi ndërprerje të energjisë elektrike në disa zona. Si pasojë e kushteve të vështira atmosferike, në disa pjesë të Bashkisë Kolonjë janë dëmtuar dhe thyer shtylla elektrike, si edhe tranversat përkatëse.
Ndërkohë, në aksin rrugor Ersekë–Rehovë janë evidentuar problematika për shkak të rrëzimit të pemëve. Zjarrfikësit e Kolonjës kanë ndërhyrë menjëherë për pastrimin e rrugës, e cila tashmë është plotësisht e qarkullueshme.
