Trajneri i Arsenalit, Mikel Arteta, ka konfirmuar se Bukayo Saka do të mungojë për “më shumë se dy muaj” pasi iu nënshtrua një operacioni për dëmtimin në kofshë.
Sulmuesi 23-vjeçar doli nga loja në pjesën e parë të fitores 5-1 të Arsenalit ndaj Crystal Palace më 21 dhjetor dhe u largua nga stadiumi me paterica.
Saka, një nga lojtarët kyç të Arsenalit, ka shënuar 9 gola dhe ka dhënë 13 asistime në 24 ndeshje në të gjitha kompeticionet këtë sezon.
Pas fitores 1-0 ndaj Ipswich të premten mbrëma, ndeshja e parë e Arsenalit pa Sakën, Arteta dha një përditësim mbi kohën e rikuperimit të sulmuesit të kombëtares angleze.
“Ai kreu një procedurë,” tha trajneri i Arsenalit. “Gjithçka shkoi mirë, por për fat të keq do të mungojë për shumë, shumë javë.
Kur them shumë javë, mendoj se do të jetë më shumë se dy muaj. Nuk e di saktësisht se sa më gjatë.
Kjo do të varet nga mënyra se si fillon të shërohet indi i plagës, sidomos gjatë javës së parë dhe lëvizshmëria e tij. Le të shohim, është shumë e vështirë të thuhet.”
Lajme pozitive për Sterlingun
Ndërkohë, Arsenal ka marrë një lajm të mirë për gjendjen fizike të Raheem Sterling, i cili pritet të rikthehet më shpejt nga sa ishte parashikuar.
Para ndeshjes me Ipswich, Arteta kishte deklaruar se sulmuesi 30-vjeçar, i marrë hua nga Chelsea, do të mungonte për disa javë për shkak të një dëmtimi në gju.
Por dëmtimi nuk është aq serioz sa u mendua fillimisht dhe Sterling mund të jetë i gatshëm për lojë së shpejti.
“Po, duhet të shohim këtë javë si do të evoluojë,” shtoi Arteta. “Prisnim që dëmtimi në gju të kërkonte më shumë kohë, por situata ka evoluar pozitivisht gjatë ditëve të fundit. Shpresojmë që kjo të jetë një lajm i mirë, sepse kemi nevojë për të.”
Arsenali, i cili ndodhet gjashtë pikë pas liderëve të Liverpoolit në renditje, do të luajë ndeshjen e radhës më 1 janar, kur do të vizitojë Brentfordin.
