Në javën e parafundit të fazës së grupeve të Ligës së Kampionëve, Manchester City pësoi një humbje befasuese në shtëpi ndaj Bodo/Glimt, të cilët regjistruan fitoren e tyre të parë në këtë edicion të kompeticionit, duke triumfuar 3-1.
Ndeshja mori një kthesë të papritur për skuadrën e Pep Guardiolës, pasi norvegjezët shënuan dy gola brenda dy minutash. Høgh realizoi dy herë në minutat 22 dhe 24, pas asistimeve të Blomberg, duke e mbyllur pjesën e parë me avantazhin 2-0 për Bodo/Glimt.
Në pjesën e dytë, miqtë ishin pranë golit të tretë me Evjen, por realizimi u anulua për pozicion jashtë loje. Megjithatë, Bodo/Glimt nuk u ndal dhe gjeti golin e tretë me Hauge, duke thelluar rezultatin në 3-0.
Manchester City tentoi të rikthehej në lojë dhe shkurtoi diferencën në minutën e 60, kur Cherki shënoi për 3-1, duke rihapur përkohësisht takimin. Por shpresat e vendasve u shuan shpejt, pasi Rodri u ndëshkua me karton të kuq pas dy kartonëve të verdhë brenda pak minutash, duke e lënë City-n me një lojtar më pak në një moment vendimtar.
Me këtë fitore, Bodo/Glimt ngjitet në kuotën e 6 pikëve, ndërsa Manchester City mbetet në 13. Kjo disfatë përbën një goditje të rëndë për kampionët anglezë, të cilët synojnë një ecuri sa më të fortë në fazat e ardhshme të Ligës së Kampionëve.
