Partia Demokratike ka nisur zyrtarisht përgatitjet për zgjedhjet e brendshme për kryetarin e saj, që pritet të mbahen në prill. Hapi i parë i këtij procesi është verifikimi dhe rifreskimi i listave të anëtarësisë në të gjitha degët e partisë në vend.
Sekretari i përgjithshëm i PD-së, Flamur Noka, ka shpërndarë një udhëzim për degët e partisë, ku kërkohet ngritja e grupeve të posaçme të punës për kontrollin e listave të anëtarësisë. Afati i fundit për përfundimin e këtij procesi është data 20 shkurt.
Sipas dokumentave të publikuara nga mediat anëtarët aktivë të PD-së do të pajisen me karta anëtarësie. Ndërkohë, do të përjashtohen nga listat ata që:
kanë punuar kundër interesave të PD-së në fushata zgjedhore;
kanë mbështetur publikisht kundërshtarët politikë;
kanë shkelur Statutin dhe Kodin e Etikës së partisë;
kanë bashkuar qëndrimet apo votat me kundërshtarët politikë në çështje të rëndësishme.
Procesi prek edhe demokratët që janë pjesë e administratës shtetërore.
Ndërkohë, së fundmi Partia Demokratike është përfshirë në përplasje të brendshme lidhur me garën për kryetarin e partisë. Kryetari i PD-së, Sali Berisha, është shprehur se ish-deputeti Ervin Salianji është vetëpërjashtuar nga gara, me argumentin se ka shkelur Statutin e partisë dhe, për rrjedhojë, nuk mund të kandidojë për kryetar të PD-së.
Nga ana tjetër, Salianji e ka kundërshtuar këtë qëndrim, duke theksuar se askush nuk është mbi Kushtetutën e Partisë Demokratike, e cila, sipas tij, është miratuar me votë nga anëtarësia. Ai ka deklaruar se Statuti i PD-së nuk njeh konceptin e “vetëpërjashtimit” dhe se do të vijojë të përfaqësojë shqetësimet e demokratëve, duke bërë thirrje për bashkim, respekt të rregullave dhe dinjitet brenda partisë.
