Ndryshimet e vogla në stilin e jetesës mund të sjellin ndikime të mëdha në shëndet dhe jetëgjatësi. Shkencëtarët kanë vërtetuar se aktiviteti fizik i përditshëm, edhe në sasi minimale, redukton rrezikun për sëmundje serioze si sëmundjet kardiovaskulare, goditjet në tru, diabeti i tipit 2 dhe disa forma të kancerit. Sipas rekomandimeve, të rriturit duhet të jenë aktivë çdo ditë, duke përfshirë ushtrime aerobike dhe forcimi i muskujve, dhe të synojnë rreth 150 minuta aktivitet fizik në javë.
Studimet recente tregojnë se përfitimet e aktivitetit fizik fillojnë më herët se sa ishte menduar. Hulumtimet sugjerojnë se ecja për vetëm 10 minuta në ditë mund të shtojë deri në një vit jetë, sidomos për ata mbi moshën 60 vjeçare. Një studim britanik ka treguar se meshkujt mund të fitojnë deri në 16 muaj jetë shtesë nga aktiviteti fizik i rregullt, ndërsa gratë rreth 11 muaj.
Një tjetër çështje e rëndësishme është se sa më shumë të rritet koha dhe intensiteti i ecjes, aq më të mëdha janë përfitimet. Shembujt tregojnë se ecja për 30 minuta në ditë mund të zgjat jetën e burrave me rreth dy vjet e gjysmë dhe tek gratë me rreth 16 muaj.
Ekspertët theksojnë se nuk janë të nevojshme programe stërvitore të natyrës intensive, por është e rëndësishme të krijohet një rutinë e qëndrueshme e lëvizjes. Hapat e vegjël, si ecja, ngjitja e shkallëve dhe aktivitete të tjera të thjeshta, janë mënyra efektive për të përmirësuar shëndetin. Edhe disa minuta aktivitet fizik çdo ditë janë më të vlefshme se ushtrime të ralla dhe intensive, duke e kthyer lëvizjen në një aleat të fortë për shëndetin, jetëgjatësinë dhe cilësinë e jetës. Kështu, adoptimi i një stili jetese aktiv, përmes ndryshimeve të vogla dhe të përditshme, mund të ndikojë thellësisht në mirëqenien fizike dhe emocionale të individëve.
