Pas rreth dy orësh ndërprerje të energjisë elektrike, është riparuar avaria në linjën 110 kV të NST Traktora. Pra në disa zona të Tiranës është rikthyer energjia elektrike.
OSHEE njoftoi më herët se rreth orës 20:30 u stakua linja e transmetimit 110 kV Tirana 220 kV – Traktora, duke lënë për disa minuta pa energji elektrike disa zona të kryeqytetit. Menjëherë pas defektit, grupet e OSSH-së ndërhynë për të menaxhuar situatën, duke manovruar me linjat e dyta përmes skemave unazë.
Sipas njoftimit, institucionet me rëndësi të veçantë janë furnizuar pa ndërprerje me energji elektrike, ndërsa në disa zona energjia është rikthyer brenda 30 minutash. Sipas OSHEE, pa energji elektrike ishte një pjesë e rrugës “Ali Demi”, zona pranë Teleferikut, Fresku, zonat pranë “Rruga e Elbasanit”, etj.
Situata më skandaloze ndodhi në spital, atje ku në repartin e reaminacionit pacientët u nxorrën me shpejtësi nëpër korridore për tu dërguar në ambiente ku aparaturat funksionojnë. Jeta e këtyre pacientëve varet nga funksioni i aparaturave, dhe ky rast përbën një skandal i cili duhet hetuar nga prokuroria.
