Gjatë turit të Foltores në Kombinat mbrëmjen e sotme, kryetari i Partisë Demokratike, Sali Berisha, bëri thirrje për kryengritje paqësore më 24 janar, duke theksuar se kjo është detyrë historike për të siguruar që vota e lirë të realizohet dhe opozita të fitojë zgjedhjet.
Ai u bëri apel qytetarëve që të bashkohen për të rikthyer Shqipërinë në rrugën e dinjitetit, zhvillimit dhe mbrojtjes së interesit kombëtar, duke theksuar se vetëm përmes angazhimit të qytetarëve mund të ndalet plaçkitja e pasurive publike.
Berisha: Demokratët, sot më shumë se kurrë, në emër të të vërtetave që besojnë, në emër të idealeve të tyre, dinjitetit njerëzor, janë të ftuar dhe të detyruar me një kryengritje paqësore të pandërprerë, të largojmë nga pushteti dhe të përmbushim misionin tonë. Ne jemi parti misioni. Të përmbushim misionin tonë, qytetarët shqiptarë të votojnë të lirë, opozita në mënyrë absolute fiton zgjedhjet dhe Shqipëria rikthehet në rrugën e dinjitetit, në rrugën e zhvillimit. Edhe njëherë, ju ftoj ju, ftoj të gjithë qytetarët e Kombinatit, Tiranës dhe mbarë Shqipërisë, më 24 janar, në provën tonë të fuqishme përballë regjimit më të urryer që shqiptarët kanë patur pas Enver Hoxhës gjer sot.
Nga ana tjetër, ish-deputeti Ervin Salianji, ditën e sotme zhvilloi foltoren e radhës në Lezhë. Ai deklaroi se shtëpia e tij është PD dhe nuk ka qëllim të krijojë një forcë të re politike, por theksoi se ka ardhur koha për rotacion.
