Ish-deputeti Ervin Salianji, i ka dërguar një mesazh nga Lezha kryedemokratit Sali Berisha për mënyrën se si po punon opozita, duke theksuar se “5-çja fantastike e lidershipit”, nuk po lejon të rrëzohet qeveria.
“Pse sulmojnë këta më shumë demokratët sesa Ramën?”, pyeti ai ndërsa shtoi se demokratët që i janë bashkuar atij, po gjykohen nga ata që humbin çdo palë zgjedhje.
Ai akuzoi drejtuesit aktualë se përdorin pushtetin e opozitës për të dobësuar partinë, në vend që ta përdorin për të rrëzuar qeverinë aktuale.
“Ne kemi pyetjen e thjeshtë, ‘çfarë ju mungon 5-çja fantastike e lidershipit që ta bëjmë PD fituese?’ Çfarë pengu keni që nuk e lini PD-në që të shpërthejë me energjinë e demokratëve, për të rrëzuar qeverinë e Edi Ramës? Sepse lidershipi është në pushtetin e opozitës. Por në vend që të përdoret pushteti për të shkatërruar PD-në dhe demokratët, duhet përdorur pushteti për të larguar qeverinë e Ramës”, tha ai më tej.
Salianji ironizoi edhe përjashtimin e tij nga strukturat e PD-së, duke theksuar se statuti i Partisë Demokratike nuk të largon për mendim ndryshe, por vetëm nëse humbet zgjedhjet.
Salianji: Në Shqipëri demokratët nuk kanë më frikë, nuk kanë çfarë të humbin. Interesi im është që PD të vijë në pushtet, ndërsa këta kanë hall të sulmojnë demokratët që kërkojnë PD të vijë në pushtet.
Por pse sulmojnë këta më shumë demokratët sesa Ramën? A dini gjë ju? Ne po na gjykojnë ata që humbin çdo palë zgjedhje. Ne jemi ndryshe, ne jemi fitues. Ne kemi guximin për të fituar. Askush nuk na largon dot nga PD. Ne kemi pyetjen e thjeshtë, ‘çfarë ju mungon 5-çja fantastike e lidershipit që ta bëjmë PD fituese?’
Çfarë pengu keni që nuk e lini PD-në që të shpërthejë me energjinë e demokratëve, për të rrëzuar qeverinë e Edi Ramës? Sepse lidershipi është në pushtetin e opozitës. Por në vend që të përdoret pushteti për të shkatërruar PD-në dhe demokratët, duhet përdorur pushteti për të larguar qeverinë e Ramës.
Sepse të nderuar miq, kjo puna e përjashtimeve ka vetëm një element. Nuk përjashtohet njeri për mendim ndryshe. PD është demokratizuar edhe me statut. Dhe statuti nuk të largon për mendim ndryshe, por vetëm nëse humbet zgjedhjet. PD ka nevojë për ripërtëritje.
