Kryeministri Edi Rama, në podcastin e tij Flasim, foli për premtimin e tij zgjedhor për anëtarësimin e Shqipërisë në Bashkimin Europian në vitin 2027.
Ndryshe nga deklaratat e mëparshme optimiste, Rama u shfaq më realist, duke pranuar se procesi i anëtarësimit është i vështirë dhe se përpara vendit qëndron një volum i madh legjislativ që ende nuk ka kaluar filtrin vendimmarrës.
Megjithatë, edhe këtë herë, pranimi i vështirësive u shoqërua me sulme ndaj mediave kritike, të cilat kryeministri vijon t’i etiketojë si “tenxhere” apo “kazanë”, duke i akuzuar se dezinformojnë opinionin publik. Sipas Ramës, qeveria dhe shumica parlamentare duhet të përballen jo vetëm me sfidat e integrimit, por edhe me atë që ai e quan “front i gjerë dezinformimi”.
Duke dashur “të mbulojë diellin me shoshë”, kryeministri ka deklaroi se bashkëpunimi me Emiratet e Bashkuara Arabe dhe Italinë i jep Shqipërisë një avantazh strategjik.
Të dyja këto bashkëpunime janë kritikuar nga mediat, të cilat Rama i quan “kazanë”. Konkretisht, kompania Presight AI Ltd, me qendër në Abu Dhabi, e drejtuar nga Sultan Al Jaber, ministër i Industrisë dhe Teknologjisë së Avancuar të Emirateve të Bashkuara Arabe, është caktuar të kryejë survejimin e qytetarëve shqiptarë në kuadër të projektit “Smart City”.
Bëhet fjalë për një marrëveshje të mbyllur, pa garë, ku një kompani e regjistruar rishtazi do të instalojë mijëra kamera, sensorë dhe pajisje të inteligjencës artificiale, duke administruar të dhënat e qytetarëve, trafikun dhe lëvizjet brenda territorit të Shqipërisë. Përveç mënyrës së dyshimtë se si u miratua projekti, ai ka qenë në qendër të kritikave edhe për faktin se cenon privatësinë e qytetarëve.
Ndërkohë, marrëveshja me Italinë për emigrantët në kampin e Gjadrit, përveçse është kritikuar nga mediat që Rama i quan “kazanë”, është kundërshtuar gjerësisht edhe nga mediat italiane, pasi konsiderohet se shkel të drejtat e njeriut.
“Për shumicën qeverisëse duhet të jetë e qartë se procesi do të vijë duke u vështirësuar pasi ka një volum legjislativ që kurrë më parë nuk ka kaluar filtrin vendimmarrës. Por unë jam besimplotë dhe i bindur që Grupi Parlamentar do jetë në lartësinë e kësaj sfide. Është e rëndësishme të rrisim komunikimin me mbështetësit e PS dhe betejën me frontin e gjerë të dezinformimit në të gjitha tenxheret që gurgullojnë ditë e natë.
Por rruga drejt BE do të jetë e pandalur. Një moment i rëndësishëm u shënua gjatë vizitës sonë në Emiratet e Bashkuara. Kam qenë shumë krenar kur kam folur për bashkëpunimin mes Emirateve të Bashkuara, Shqipërisë e Italisë, ku Shqipëria ka rol kyc ku do krijohet kapacitet gjenerimi dhe i jep Shqipërisë avantazh strategjik”, tha Rama.
