Sekretari i Përgjithshëm i NATO-s, Mark Rutte, në një konferencë për media në Zagreb, theksoi rëndësinë e Groenlandës për Aleancën e Atlantikut të Veriut dhe njoftoi se vendet anëtare janë angazhuar për të garantuar sigurinë e këtij ishulli në Arktik. Rutte theksoi se Rusia përbën kërcënimin kryesor për NATO-n dhe Evropën, duke nënvizuar nevojën për të mbajtur Arktikun të sigurt.
Gjatë takimit, kryeministri kroat, Andrej Pllenkoviq, e vuri theksin në rëndësinë e respektimit të sovranitetit të Groenlandës si pjesë e Danimarkës. Ai shprehu besimin se përmes dialogut, mund të arrihet një zgjidhje e pranueshme për të gjitha palët. Ndërsa Rutte e mohoi mundësinë që interesi amerikan për Groenlandën të përbënte krizën më të madhe për Aleancën, ai vlerësoi stimulimin e shpenzimeve ushtarake nga presidenti amerikan si një tregues të unitetit brenda NATO-s.
Rutte ceku gjithashtu angazhimin e vendeve me dalje në Arktik për të forcuar sigurinë në rajon, duke përmendur investimet e Danimarkës në pajisje ushtarake dhe kapacitete mbrojtëse. Një tjetër temë e diskutuar ishte anëtarësimi i Ukrainës në NATO, për të cilin Rutte pranoi se nuk ka një konsensus të plotë mes vendeve anëtare. Disa vende, përfshirë Hungarinë dhe SHBA-në, janë skeptike ndaj një anëtarësimi të tillë.
Pllenkoviq theksoi rëndësinë e mbështetjes për Ukrainën, duke përmendur ndihmat që vendi i tij ka ofruar, si 300 milionë euro në pajisje ushtarake që nga fillimi i luftës. Ai nënvizoi se Ukraina duke u mbrojtur, mbron jo vetëm lirinë e saj, por edhe demokracinë dhe stabilitetin e kontinentit evropian. Të dy zyrtarët e lartë patën një diskutim të thelluar mbi pasojat e agresionit rus, duke e lidhur sigurinë e Ukrainës ngushtë me sigurinë e NATO-s dhe Evropës.
