DVP Vlorë ka finalizuar operacionin policor të koduar “Green flat”, i cili ka çuar në zbardhjen dhe goditjen e një rasti të kultivimit të bimëve narkotike në Sarandë. Gjatë operacionit, u sekuestruan 260 bimë narkotike dhe 26.6 kg kanabis, si dhe pajisje elektrike të specializuara për kultivimin dhe përpunimin e këtyre bimëve, me qëllim shpërndarjen e lëndës narkotike.
Një person, E. P., 30 vjeç, u arrestua në flagrancë në apartamentin që kishte përshtatur për këtë aktivitet kriminal. Ky apartament ndodhej në rrugën “Butrinti” dhe rezultoi i pajisur me llamba elektrike dhe pajisje për tharjen e bimëve, që i shërbenin kultivimit të tyre. Duke u mbështetur në informacione nga inteligjenca informative dhe hetime të gjatë, Sektori për Hetimin e Narkotikëve në DVP Vlorë dhe Komisariati i Policisë Sarandë, në bashkëpunim me Prokurorinë, arritën të zbulojnë këtë aktivitet të paligjshëm.
Përveç arrestimit të E. P., në kërkim është shpallur edhe M. Q., 26 vjeç, banues në Korçë, i dyshuar si bashkëpunëtor i tij. Po ashtu, janë proceduar penalisht katër punonjës të OSHEE Sarandë për shpërdorim detyre, të cilët dyshohen se kanë ndihmuar në këtë aktivitet përmes lidhjeve të paligjshme me rrjetin e energjisë elektrike. Emrat e tyre janë: H. A. (54 vjeç), H. C. (34 vjeç), E. P. (47 vjeç) dhe F. H. (32 vjeç).
Gjatë operacionit, përveç bimëve narkotike, u sekuestruan gjithashtu 70 llamba elektrike, 70 siguresa, 260 mbështjellëse për kultivim, një automjet dhe tre celularë, si dhe pajisje të tjera të përdorura në këtë aktivitet kriminal. Policia vijon punën intensive për kapjen e të dyshuarve të tjerë dhe identifikimin e individëve të përfshirë në këtë veprimtari. Materialet procedurale iu referuan Prokurorisë për veprime të mëtejshme.
