Agjencia e Mbikëqyrjes Policore për rajonin Shkodër–Lezhë ka arrestuar në flagrancë një punonjës policie, shtetasin I.D., me detyrë shef i Logjistikës pranë DVKM Kukës, i dyshuar për drejtim mjeti në gjendje të dehur dhe shkelje të rregullave të qarkullimit rrugor.
Ngjarja ka ndodhur mbrëmjen e djeshme, rreth orës 20:00, në aksin rrugor Milot–Morinë, ku I.D. u përfshi në një aksident automobilistik me mjetin e tij.
Si pasojë e përplasjes, janë dëmtuar pasagjerët e një automjeti tjetër, mes tyre shtetasja XH.H. dhe dy fëmijë të mitur. Të lënduarit janë transportuar në Spitalin e Traumës, ku ndodhen jashtë rrezikut për jetën.
Testimi me aparat matës të alkoolit ka rezultuar pozitiv për I.D., me vlera 1.00 mg/l dhe 0.98 mg/l, duke konfirmuar drejtimin e mjetit nën ndikimin e alkoolit.
Sipas njoftimit zyrtar, ndaj tij rëndojnë veprat penale “Drejtimi i automjetit në gjendje të dehur” dhe “Shkelja e rregullave të qarkullimit rrugor”, parashikuar nga nenet 290/1 dhe 291 të Kodit Penal.
Arrestimi u krye në vendngjarje nga strukturat e Agjencisë së Mbikëqyrjes Policore, të cilat ndërhynë menjëherë për të administruar situatën dhe për të garantuar sigurinë e qytetarëve.
