Qarku i Dibrës po përjeton kushte të vështira dimërore, me temperatura që në disa zona kanë zbritur deri në -15 gradë Celsius, duke shkaktuar probleme serioze në qarkullimin rrugor, veçanërisht në zonat rurale.
Në Bashkinë Dibër, rruga Peshkopi–Lurë është plotësisht e bllokuar nga bora, ndërsa në aksin Peshkopi–Selishtë qarkullimi lejohet vetëm me zinxhirë. Në disa njësi administrative, përfshirë Selishtë, Lurë, Kala e Dodës, Zall Dardh, Tomin dhe Lurë, rrugët e brendshme raportohen të pakalueshme.
Situatë problematike paraqitet edhe në Bashkinë Bulqizë, ku rruga që lidh Qytetin e Vjetër me Qytetin e Ri pranë terminalit është e bllokuar për shkak të ujit dhe akullit. Po ashtu, rrugët në njësitë Trebisht, Ostren, Martanesh dhe pjesërisht në Zerqan e Fushë Bulqizë janë të pakalueshme.
Ndërkohë, në Bashkinë Klos vijojnë operacionet e kërkimit për një 30-vjeçar që dyshohet se është mbytur në lumin Mat, ndërsa kushtet e vështira atmosferike e bëjnë ndërhyrjen më të komplikuar.
Në Bashkinë Mat, disa rrugë të njësisë administrative Macukull janë të bllokuara nga bora, ndërsa rruga lidhëse e njësisë Derjan rrezikon të bllokohet. Megjithëse akset nacionale mbeten përgjithësisht të kalueshme, rruga Ura e Çerenecit–Steblev është pothuajse e pakalueshme për shkak të mungesës së pastrimit nga bora.
Në aksin e Rrugës së Arbërit, si dhe në rrugët Qafë Bualli–Krastë dhe Peshkopi–Vasie, qarkullimi lejohet vetëm me goma dimërore.
Autoritetet vendore dhe strukturat e emergjencës janë në terren me mjete borëpastruese dhe kriposje për të mbajtur rrugët funksionale. Furnizimi me energji elektrike është kryesisht normal, përjashtuar disa zona si Kala e Dodës dhe fshatrat e njësisë Ulëz në Mat, ku ka ndërprerje. Ndërkohë, furnizimi me ujë të pijshëm në të gjithë qarkun raportohet normal.
Situata kërkon angazhim të vazhdueshëm nga autoritetet për të garantuar sigurinë e lëvizjes dhe ofrimin e shërbimeve bazë për banorët.
