Manchester City dhuroi spektakël në FA Cup, duke e “sheshuar” Exeter City 10-1 në Etihad, në një ndeshje ku spikati debutimi i bujshëm i Antoine Semenyo dhe rikthimi te goli i Rodrit pas një pauze shumë të gjatë.
Semenyo, i transferuar së fundmi nga Bournemouth për 62.5 milionë £, u hodh menjëherë titullar dhe la shenjë: shënoi një gol dhe dha asist, duke treguar pse Guardiola këmbënguli për afrimin e tij. Ganezi u duartrokit gjatë dhe u kthye menjëherë në një nga emrat më të komentuar pas ndeshjes.
Në të njëjtën kohë, Rodri u rikthye te goli me fanellën e City-t pas 600 ditësh (hera e fundit kishte shënuar më 19 maj 2024 ndaj West Ham, gol që praktikisht “vulosi” titullin e Premier League). Mesfushori spanjoll, fitues i Topit të Artë 2024, sapo është kthyer edhe nga një tjetër periudhë dëmtimi dhe ky gol shihet si sinjal i fortë për formën e tij.
City nuk e ndali ritmin dhe e ktheu ndeshjen në “festë” me plot 10 gola në total, duke e mbyllur me një fitore të thellë që e çon ekipin më tej në FA Cup dhe rrit optimizmin te tifozët.
