Reshjet e fundit kanë sjellë vështirësi në disa bashki të Qarkut të Korçës, kryesisht në furnizimin me energji elektrike dhe infrastrukturën rrugore.
Sipas OSHEE-së, aktualisht janë pa energji rreth 1 857 abonentë, kryesisht në zonat rurale, por edhe në disa zona urbane të Pogradecit. Problemet janë evidentuar në fiderët e NST Lozhan, Petrushë, Pogradec, Gur i Kuq dhe Leskovik.
Ekipet e OSHEE-së ndodhen në terren dhe po punojnë për riparimin e defekteve. Furnizimi për konsumatorët me rëndësi të veçantë është i garantuar, ndërsa Hidrovori i Pogradecit funksionon normalisht.
Si paraqitet situata në bashki:
Kolonjë: Rrugët rurale dhe akset kryesore në Ersekë janë pastruar dhe kriposur; po vlerësohen ndërhyrje të tjera në segmente problematike.
Maliq: Problem me çarjen e argjinaturës së Lumit Devoll; rrëshqitje dherash dhe dëmtime infrastrukturore kërkojnë investim të mëtejshëm.
Devoll: Rrugët janë hapur dhe qarkullimi po normalizohet; janë kryer ndërhyrje për parandalimin e përmbytjeve.
Pustec: Po punohet për pastrimin e përroit të Gorricës dhe riparimin e segmentit Lajthizë–Liqenas.
Korçë: Nuk raportohen problematika serioze.
Pogradec: Situatë problematike në Lumin e Verdovës, ku qarkullimi bëhet vetëm në një korsi; kërkohen ndërhyrje edhe në lumin e qytetit.
Rruga e Dardhasit raportohet e kalueshme provizorisht, ndërsa në Çërravë ka rrëshqitje dherash që rrezikojnë një banesë. Autoritetet lokale dhe strukturat e emergjencave civile vijojnë monitorimin dhe ndërhyrjet në terren për garantimin e qarkullimit dhe sigurisë së banorëve.
