Zjarri që ka përfshirë magazinat në tregun e rrobave të përdorura në zonën e 5 Majit në Tiranë vijon të jetë aktiv, ndërsa situata paraqitet e rrezikshme për shkak të dyshimeve se në ambientet që po digjen mund të ketë edhe bombula gazi.
Flakët janë të përmasave të mëdha dhe kanë shkaktuar panik te banorët dhe bizneset përreth.
Forcat zjarrfikëse po punojnë për izolimin e zjarrit dhe parandalimin e përhapjes së tij, ndërsa policia ka vendosur perimetrin e sigurisë dhe ka evakuuar banorët e pallateve pranë zonës.
Në vendngjarje ndodhen disa mjete zjarrfikëse dhe dhjetëra efektivë, të mbështetur edhe nga forca ndihmëse nga qytete të tjera.
Prefekti i Tiranës Afrim Qendro, në një komunikim për mediat nga vendngjarja, dha detaje për zjarrin.
Ai theksoi se nuk ka persona të lënduar nga flakët, duke shtuar se nuk ka lëndë të rrezikshme të përfshira nga zjarri, por janë kryesisht rroba ndërsa theksoi se situata mbetet kritike.
“Po mundohemi që të rregullojmë problemin. Kjo është një magazinë e madhe, ku operojnë disa biznese. Nuk ka gjëra të rrezikshme, por rroba dhe sende të tjera. Po pritet të vijë dhe zjarrfikësja e Elbasanit, do vijnë dhe zjarrfikëset nga ushtria. Do na ndihmojnë me furnizimin me ujë. Nuk ka persona të lënduar. Forcat e rendit kanë siguruar një perimetër. Zjarri po vazhdon. Është zjarr masiv, është magazinë shumë e madhe dhe kërkon kohën e vet. Situata është nën kontrollin e zjarrfikësve. Janë në terren 11 zjarrfikëse dhe 60 efektivë”, tha prefekti Qendro.
