Banorë të shumtë të Durrësit janë mbledhur minuta më parë në protestë pranë rrethrrotullimit të Burgut, duke shprehur zemërimin dhe pakënaqësinë e tyre ndaj asaj që e cilësojnë si neglizhencë të autoriteteve përballë përmbytjeve masive që kanë goditur zonën.
Protestuesit thonë se reshjet e dendura kanë shkaktuar dëme të mëdha në banesa dhe prona private, ndërsa reagimi institucional ka qenë i vonuar dhe i pamjaftueshëm. Me sllogane dhe thirrje, ata kërkojnë ndërhyrje të menjëhershme, dëmshpërblim për humbjet e pësuara dhe zgjidhje afatgjata për problemin e përmbytjeve.
Sipas banorëve, situata përsëritet çdo vit, pa u marrë masa konkrete për përmirësimin e infrastrukturës dhe sistemit të kullimit. Ata paralajmërojnë se protestat do të vazhdojnë nëse kërkesat e tyre nuk merren seriozisht.
Deri më tani, autoritetet lokale nuk kanë dhënë një reagim zyrtar lidhur me protestën dhe kërkesat e qytetarëve.
