Arsenal përballet me Liverpool-in në Emirates Stadium të enjten, por Mikel Arteta konfirmoi se skuadra do të ketë dy mungesa të sigurta në prapavijë.
Riccardo Calafiori është përjashtuar nga ndeshja ndaj Liverpool-it. Mbrojtësi nuk ka luajtur për “Topçinjtë” që nga fitorja në Carabao Cup ndaj Crystal Palace para Krishtlindjes dhe ka munguar në tre ndeshjet e fundit. Arteta e bëri të qartë se edhe kësaj here ai nuk do të jetë i gatshëm.
Po ashtu, jashtë mbetet edhe Cristhian Mosquera, i cili pësoi një dëmtim në kyçin e këmbës kundër Brentford në fillim të dhjetorit. Trajneri shpjegoi se mbrojtësi ende nuk është rikthyer në stërvitje, dhe kur u pyet nëse Calafiori dhe Mosquera mund të jenë në dispozicion për Liverpool-in, u përgjigj shkurt: “Jo.”
Sa i përket rikthimit të tyre, Arteta u shpreh optimist: “Mendoj shumë shpejt. U ka mbetur faza e fundit e rehabilitimit. Shpresoj që shumë shpejt të jenë të gatshëm për përzgjedhje.”
Gjendja e përgjithshme e dëmtimeve, megjithatë, konsiderohet më pozitive për Arsenalin, sidomos në repartin ofensivë. Kai Havertz nuk ishte në listë kundër Bournemouth të shtunën, por Arteta sqaroi se kjo ishte thjesht një vendim për menaxhimin e ngarkesës, jo një përkeqësim i gjendjes së tij pas dëmtimit në gju. “Po e monitorojmë. Ka qenë jashtë për një kohë të gjatë. Është shumë afër, u stërvit përsëri sot në mëngjes,” tha Arteta, duke shtuar se shpreson ta ketë shumë shpejt në dispozicion “në versionin më të mirë”.
