Një drejtues i sektorit të infrastrukturës ka pranuar se punimet për hapjen e një tuneli në verilindje të Melburnit kanë ndikuar në krijimin e një grope gjigante që u hap dje në një fushë sportive aty pranë.
Shembja e tapetit të barit u vu re pasditen e djeshme dhe gjatë natës në AJ Burkitt Oval, në Heidelberg. Drejtori ekzekutiv i Victorian Infrastructure Delivery Authority (VIDA), Duncan Elliott, konfirmoi se dy makina shpimi tunelesh, të angazhuara në projektin North East Link, ndodheshin vetëm pak metra larg vendit ku u shfaq gropa e madhe.
“Jemi të bindur se makinat e shpimit kanë qenë një faktor kontribues — jo domosdoshmërisht shkaku i drejtpërdrejtë — por padyshim pjesë e problemit, dhe kjo është pjesë e hetimit,” tha Elliott.
Rreth zonës është vendosur një perimetër sigurie, ndërsa punimet e tunelit janë pezulluar deri në përfundimin e hetimeve. Elliott theksoi se puna nuk do të rifillojë pa u siguruar që të gjitha planet dhe procedurat e sigurisë të jenë respektuar, nën mbikëqyrjen e WorkSafe dhe vetë VIDA-s.
Ndërkohë, klubet sportive lokale po përpiqen të gjejnë vende alternative për të vazhduar aktivitetet. Presidenti i Banyule Cricket Club, Brad Bowler, tha se të paktën 14 ekipe të klubit të tij janë prekur nga kjo situatë.
“Është një zonë shumë e frekuentuar dhe humbja e kësaj fushe, qoftë edhe për një javë apo më gjatë, do të sjellë shumë probleme,” u shpreh ai, duke shtuar se klubi do të pësojë humbje financiare, por siguria mbetet prioritet. “Është zhgënjyese dhe nuk është e mirë për atë që po përpiqemi të promovojmë — aktivitetin fizik dhe sportin në komunitet.”
Banori lokal, Chez Raccosta, tha se shpesh dëgjonte punimet e North East Link gjatë natës, por zhurma nuk ishte shqetësuese. Megjithatë, ai e cilësoi situatën si “pak shqetësuese”, edhe pse shprehu besim te inxhinierët.
Banorët u mblodhën pranë vendit të ngjarjes mbrëmë, përpara se policia ta rrethonte zonën, ndërsa autoritetet u kanë bërë thirrje qytetarëve të qëndrojnë larg. Sipas autoriteteve, nuk ka të lënduar si pasojë e gropës.
