Kryetari i Partisë Demokratike, Sali Berisha, u paraqit ditën e sotme në Prokurorinë e Posaçme (SPAK), në zbatim të masës së sigurisë “detyrim paraqitje”, në kuadër të hetimeve për dosjen “Partizani”.
Pas daljes nga ambientet e SPAK, Berisha bëri publik mesazhin që kishte lënë në këtë institucion. Edhe pse Altin Dumani, ish-kreu i SPAK, është larguar nga detyra në muajin dhjetor, Berisha ia dedikoi atij mesazhin e tij.
“Këtu në SKAP lashë këtë shënim: Altin Troplinit, Pajës së SKAP-it (i mbeti atij, nuk ia vura unë, që kur e fali Elvis Doçin), armikut të pluralizmit politik dhe avokatit të McGonigalit, me garanci se krimet e tij nuk do të mbeten pa ndëshkimin e merituar ligjor. Sali Berisha”, tha kreu i PD për gazetarët.
Ish-kryeministri, i akuzuar për korrupsion, ndodhet në proces gjyqësor për dosjen “Partizani” së bashku me dhëndrin e tij, Jamarbër Malltezi, si edhe me të pandehurit e tjerë Fatmir Bektashi, Xhimi Begeja dhe një juriste.
Dosja kaloi për gjykim më 19 maj. Berisha akuzohet për korrupsion pasiv të zyrtarëve të lartë.
Sipas SPAK, Berisha, në cilësinë e kryeministrit, ka ndërmarrë veprime konkrete për miratimin e ligjeve dhe akteve nënligjore, nga të cilat kanë përfituar subjekte private, përfshirë edhe dhëndrin e tij.
