Një hetuese policore në Suedi është përballur me akuza për mashtrimin e pushimeve shëndetësore, të cilat ajo dyshohet se i ka shfrytëzuar për të zgjatur pushimet e saj verore në Kosovë për tri vite me radhë. Kjo situatë u zbulua pas një rritjeje të papritur të numrit të policëve që kërkonin pushim shëndetësor gjatë verës, duke nxitur hetime nga autoritetet në Stokholm.
Hetimet treguan se hetuesia kishte kërkuar pushim shëndetësor pikërisht në ditën kur duhej të kthehej nga pushimi vjetor. Ajo, me origjinë shqiptare, pretendon se kishte pasur probleme me shëndetin mendor dhe shprehu keqardhje për akuzat, duke theksuar se ka pasur një etike të lartë në punë dhe se nuk kishte marrë asnjëherë një vit të plotë pushim shëndetësor. Ajo theksoi se ka të drejtë për të qenë e sëmurë kudo që ndodhet.
Sidoqoftë, hetimet lanë të kuptohej se fluturimet e saj për pushime ishin rezervuar pas datës kur ajo duhej të rikthehej në punë. Përmes këtyre pushimeve shëndetësore, ajo kishte përfituar rreth 17 mijë krona suedeze (1571 euro). Tani, ajo përballet me akuza për mashtrim dhe deklarim të rremë, duke rrezikuar deri në gjashtë muaj burgim.
Mediat suedeze kanë publikuar video që e tregojnë policen gjatë ditëve kur ajo duhej të ishte në punë, duke shijuar pushimet në Prizren. Në Suedi, rregullat e punës parashikojnë që punonjësit lejohet të marrin deri në shtatë ditë pushim shëndetësor pa pasur nevojë për dëshmi mjekësore. Vetëm për ditën e tetë kërkohet dokumentacion përkatës.
Ky rast hedh dritë mbi keqpërdorime të mundshme në sistemin e pushimeve shëndetësore dhe zgjon debate mbi etikën e punës dhe përgjegjësitë e punonjësve në institucionet shtetërore.
