Të premten, vendi ynë do të ndikohet nga kushte atmosferike të paqëndrueshme. Moti parashikohet me vranësira mesatare deri të dendura, ndërsa në pjesën e parë të ditës do të ketë edhe intervale afatshkurtra me diell, kryesisht përgjatë ultësirës perëndimore.
Vranësirat do të shoqërohen me reshje shiu të herëpashershme dhe me intensitet të ulët në pjesën më të madhe të territorit. Në periudha të shkurtra dhe në zona të izoluara, reshjet do të jenë në formën e shtrëngatave. Në veriperëndim priten reshje me intensitet mesatar dhe lokalisht deri të lartë.
Në zonën e Alpeve dhe në relievet malore të lindjes dhe juglindjes, në lartësitë mbi 700–800 metra, reshjet do të jenë në formë dëbore me intensitet të ulët deri mesatar.
Era do të fryjë nga juglindja drejt jugperëndimit me shpejtësi mesatare rreth 10 m/s, ndërsa përgjatë vijës bregdetare dhe në zonat luginore ajo do të arrijë deri në 18 m/s. Valëzimi në det pritet të jetë i forcës 4–5 ballë.
Temperaturat do të shënojnë rënie të ndjeshme, duke zbritur deri në -6 gradë Celsius në Bajram Curr, Peshkopi dhe Korçë.
