Policia ka mundur të identifikojë dhe të vërë në pranga personin i cili mbrëmjen e së shtunës u fut me forcë në një bankë të nivelit të dytë në qytetin e Korçës.
Blutë e qytetit juglindor bëjnë me dije se rreth pas kontrolleve intensive u bë i mundur identifikimi i Valter Xhelillarit. Ky shtetas, rreth orës22:05 të së shtunës u fut në ambientet e bankës, ku qëndroi për disa sekonda, mirëpo u largua menjëherë sapo konstatoi se Policia mbërriti në vendin e ngjarjes.
Para hetuesve 38-vjeçari ka deklaruar se nuk mban mend asgjë pasi atë natë ka qenë i dehur.
“Unë kam qenë në gjendje të dehur dhe nuk mbaj mend asgjë”, tha ai.
Nga pamjet e bëra publike më herët ky shtetas shihej teksa futej në ambientet e bankës, i pa maskuar dhe me një telefon në duar.
Policia njoftoi se autori është futur të grabisë bankën me telefon në dorë ku ka qenë live në Tik Tok. Por, sapo konstatoi efektivët ai u largua duke mos arritur të marrë asgjë.
Njoftimi i Policisë Korçë:
Policia e Korçës identifikon, kap dhe vë në pranga shtetasin që hyri me forcë në ambientet e një banke të nivelit të dytë në Korçë.
Pas kontrolleve intensive që zgjatën 24 orë, Policia e Korçës bëri të mundur lokalizimin dhe kapjen e 38-vjeçarit.
Menjëherë pas ngjarjes së ndodhur mbrëmjen e datës 21 dhjetor, në lagjen nr.3, Korçë, shërbimet e Drejtorisë Vendore të Policisë Korçë, në bashkëpunim me shërbimet e Komisariatit të Policisë Korçë, ushtruan kontrolle të pandërprera për kapjen e autorit.
Pas identifikimit të autorit të dyshuar, bazuar dhe në inteligjencën policore, shërbimet e Policisë lokalizuan në lagjen nr.6 në Korçë dhe vunë në pranga shtetasin V. Xh., 38 vjeç, banues në Korçë.
Më datë 21.12.2024, rreth orës 22:05, 38-vjeçari ka hyrë me forcë në ambientet e një banke të nivelit të dytë, ku ka qëndruar për disa sekonda dhe është larguar menjëherë sapo ka konstatuar shërbimet e Policisë, pa marrë asgjë.
