Dhjetëra persona dyshohet se kanë humbur jetën dhe rreth 100 të tjerë janë plagosur pas një shpërthimi të fuqishëm që ndodhi gjatë natës në një bar në resortin e njohur të skive Crans-Montana, në Zvicër, njoftoi policia.
Sipas policisë së kantonit Valais, zjarri në bar shpërtheu dhe nuk ka lidhje me ndonjë akt terrorist. Autoritetet lokale konfirmuan se mes viktimave ka edhe shtetas të huaj.
Ministria e Jashtme e Italisë bëri të ditur se, sipas vlerësimeve të policisë zvicerane, rreth 40 persona kanë humbur jetën, ndërsa shumë prej tyre ende nuk janë identifikuar për shkak të djegieve të rënda që kanë pësuar trupat.
Shërbimet shëndetësore janë vënë në gatishmëri të plotë. Sipas zyrtarit lokal Mathias Renard, në operacion janë angazhuar 10 helikopterë dhe 40 autoambulanca. Njësia e terapisë intensive në spitalin e kantonit Valais është mbushur plot, ndërsa pacientët po transferohen drejt spitaleve të tjera në vend. Shumica e të plagosurve ndodhen në gjendje të rëndë shëndetësore.
Mediat lokale raportuan që në orët e para të mëngjesit se bilanci i viktimave pritej të ishte shumë i lartë, me shifra që luhaten rreth 40 të vdekur.
Shpërthimi ndodhi rreth orës 01:30 të mëngjesit (ora lokale) në barin “Le Constellation”, një lokal shumë i frekuentuar nga turistët, ku po festohej ndërrimi i viteve. Pas shpërthimit, një zjarr i madh përfshiu godinën, i cili u vu nën kontroll disa orë më vonë.
Pamjet e transmetuara nga mediat zvicerane tregojnë ndërtesën të përfshirë nga flakët, ndërsa në zonë u angazhuan forca të shumta zjarrfikëse, autoambulanca dhe ekipe shpëtimi. Autoritetet vendosën gjithashtu ndalim fluturimesh mbi qytet.
Sipas medias zvicerane Blick, dyshohet se zjarri mund të jetë shkaktuar nga fishekzjarrë gjatë një koncerti, por policia ende nuk ka dhënë një deklaratë zyrtare për shkaqet e sakta. Në momentin e shpërthimit, brenda lokalit ndodheshin mbi 100 persona, ndërsa kapaciteti i tij ishte 300 veta.
Crans-Montana është një resort luksoz skish në zemër të Alpeve zvicerane, rreth dy orë larg Bernës. Sipas BBC, në fund të janarit pritet të presë një nga garat më të rëndësishme të Kupës së Botës në ski, FIS World Cup.
