Aktorët e Teatrit Kombëtar kanë dalë me një reagim të fortë pas publikimit të një investigimi nga emisioni “Piranjat”, që hetoi për shpërdorimin e buxhetit të institucionit të teatrit. Përmes një deklarate të shpërndarë në rrjetet sociale, ata shprehen të shqetësuar dhe të revoltuar për manipulimet me fondet publike, duke e quajtur këtë një abuzim të madh që ka dëmtuar Teatrin Kombëtar dhe punën e aktorëve që e përfaqësojnë atë.
Aktorët shpjegojnë se gjatë ditëve të fundit, ata ishin dëshmitarë të investigimit të “Piranjave”, ku u zbulua sesi fondet publike për Teatrin zhduken në mënyrë të padrejtë.
Ata theksojnë se Ministria e Kulturës ka investuar në mënyrë të sinqertë për mbështetje, por fondet përfunduan në duar të gabuara, dhe nuk shkuan për mbështetje të Teatrit. Aktorët gjithashtu theksojnë se faturat e rreme dhe shpenzimet e dyshimta janë përdorur për interesat personale të individëve, duke akuzuar drejtorin e Teatrit, Altin Basha, dhe bashkëshorten e tij, Iliriana Basha, për përfshirjen në këtë skandal.
Deklarata e aktorëve:
“Këto ditë u bëmë dëshmitarë të një investigimi të emisionit ‘Piranjat’ për shpërdorimin e buxhetit të Teatrit Kombëtar. Pamë me zë dhe figurë sesi fondet publike zhduken. Sesi Ministria e Kulturës investon me dëshirën për të mbështetur Teatrin, por fondet gllabërohen rrugës.
Buxheti i Teatrit po ikën në drejtim të ditur tashmë, por ai drejtim nuk është Teatri. Janë ca fatura ‘fake’ qepur në xhepa personale! Janë ca grimiere fantazëm… Janë ca ekspertë të audio-vizualëve fantazëm! Ne jemi aktorë të Teatrit, dëshmitarë të zhvillimeve dhe e pyesim publikisht dhe ligjërisht z. Basha, drejtor i Teatrit:
Çfarë ka bërë z. Saliasi në shfaqjen ‘Vojçek’? Asgjë! Askush nuk e ka parë asnjë sekondë! Merr guximin dhe kthe fondet disa milionëshe mbrapsht, se janë të Teatrit. Pyesim publikisht z. Basha, çfarë ka bërë znj. Shuta në shfaqjen ‘Vojçek’? A ka grimuar ajo në shfaqjen ‘Vojçek’? Asnjë sekondë aty! Merr guximin dhe kthe fondet disa milionëshe mbrapsht, se janë të Teatrit. LISTA është gjatë. Tashmë ajo është publike. Përgjegjësit të marrin përgjegjësinë e tyre! MBROJE TEATRIN SOT!”
Gjatë një përballjeje me gazetaren e “Piranjave”, Basha ka kërkuar një takim zyrtar për të diskutuar çështjen, ndërsa bashkëshortja e tij, Iliriana Basha, ka mohuar çdo lidhje me fondet e kostumeve të shfaqjes “Vojçek”, të cilat ishin një nga pikat kryesore të investigimit.
Ky reagim i aktorëve ka ndezur një debat të gjerë në shoqërinë shqiptare, ku shumë prej tyre kërkojnë përgjegjshmëri dhe transparencë për shpërdorimin e fondeve publike që duhet të shërbenin për zhvillimin e kulturës dhe artit.
