Kryeministri Edi Rama ka përsëritur në këtë prag të ndërrimit të viteve apelin për institucionet e drejtësisë që të nxjerrin nga qelia kryebashkiakun e Tiranës, politikanin e lartë socialist Erion Veliaj.
Sipas tij, për dy muaj bëhet fiks 1 vit që ai është izoluar në qelitë e paraburgimit, ndërkohë që Gjykata Kushtetuese nuk ka lejuar mbajtjen e zgjedhjeve në kryeqytet, me arsyetimin se Tirana e ka kryetarin.
“Kryeqyteti, merr i fut në paraburgim kryetarin e bashkisë, pa burg pa gjë, ja u bë viti. Ka deri ën zgjedhje edhe 1 vit e gjysmë apo jo. Çfarë do bëjmë?! Rri, s’ka [problem. Ç’a të them unë, pse ma kërkon mua?! Unë e bëra një provë, t’i jepnim Tiranës një kryetar bashkie, nuk funksionoi se Gjykata Kushtetuese tha se Tirana e ka një kryetar.
Në rregull, e ka po ku e ka!? Ta nxjerrin pra, ta çojnë atje të vazhdojë detyrën, pastaj nëse gjendet i fajshëm, të shkojë të bëjë dënimin çfarë bëhet këtu, kështu?! Kjo nuk shkon dhe këto janë probleme që duhen marrë seriozisht nga të gjithë.
Këtu janë njerëzit, hetohen, gjykohen dhe pastaj ndahet shapi nga sheqeri. Po si mundet, ça janë këto kontrolle banesash, 50 kontrolle për gjëra që kanë ndodhur para 5 vjetësh. Pastaj kontrolli ka rregulla, jo hajde futemi të kapin ça të kapim”, u shpreh kryeministri Edi Rama.
Kryebashkiaku i Tiranës, Erion Veliaj u arrestua në zyrën e tij më 10 Shkurt 2025, i akuzuar për disa vepra të rënda penale, me bashkëshorten Ajola Xoxa dhe disa bashkëpunëtorë të tjerë. Gjykata Kushtetuese rrëzoi dekretin e Presidentit për zgjedhje të parakohshme në Tiranë, me arsyetimin se kryeqyteti e ka kryetarin.
