Ndërsa prej katër ditësh janë pa ujë të pijshëm në çezmat e tyre, qytetarët e Vlorës kanë dalë në protestë edhe këtë të hënë për herë të dytë pas asaj që bënë mbrëmë.
Rreth orës 11:00 ata kanë bllokuar një nga akset rrugore të qytetit, pasi më parë dështoi tentativa e tyre për t’u futur në ambientet e bashkisë, ku u ndaluan nga forcat e rendit.
Me bidonë uji bosh në duar ata hodhën letra higjienike dhe vezë drejt godinës së bashkisë, ndërsa më pas një pjesë e tyre u zhvendos në një nga rrugët e qytetit, duke bllokuar qarkullimin.
Ka qenë një defekt i shkaktuar në linjën kryesore të transmetimit në tubin kryesor që furnizon depot e qytetit, me diametër 1000 milimetra, çka ka bërë që Vlora të mbetet pa ujë, ndërsa specialistët nuk kanë mundur ta riparojnë për shkak të vështirësisë, pasi kjo është një linjë e veçantë.
