Real Madridi e përfundon vitin 2025 në majë të renditjes globale për vlerën e skuadrës, sipas përditësimeve të Transfermarkt. Pavarësisht një sezoni me luhatje në formë, “Los Blancos” vazhdojnë të kenë një grup me emra elitarë dhe ndikim të madh në tregun e futbollit.
Sipas të dhënave të publikuara, vlera totale e skuadrës së Real Madridit në fund të 2025-ës arrin në 1.38 miliardë euro, duke lënë pas konkurrencën direkte. Arsenali renditet i dyti me 1.29 miliardë euro, ndërsa Manchester City dhe PSG ndajnë vendet pasuese me nga 1.19 miliardë euro secili. Chelsea vjen shumë pranë, me 1.18 miliardë euro.
Në listën e “top 10”, Barcelona pozicionohet e gjashta dhe është skuadra e dytë spanjolle më e vlerësuar, me 1.12 miliardë euro. Liverpool është ekipi i fundit që kalon pragun e 1 miliardëshit, me 1.04 miliardë euro, ndërsa pjesën tjetër të dhjetëshes e plotësojnë Bayern Munich (981 mln), Tottenham (879 mln) dhe Manchester United (719 mln).
Pesha kryesore në këtë vlerësim, sipas të njëjtit burim, vjen nga yjet e skuadrës: Kylian Mbappé vlerësohet me 200 milionë euro, Jude Bellingham me 160 milionë, ndërsa Vinicius Jr. (150 mln) dhe Federico Valverde (120 mln) mbeten gjithashtu mbi kufirin e 100 milionë eurove.
