Kandidati për deputete nga Partia Demokratike e Kosovës, Besa Kabashi, ka kritikuar mandatin e Qeverisë Kurti, duke përmendur dështime në planprogramin e saj për sigurinë dhe mbrojtjen e vendit. Ajo, gjatë një interviste në emisionin “Zgjedhjet në KOHË”, theksoi se planifikimi ushtarak nuk duhet të bazohet në hamendje, por në nevoja reale.
Kabashi paraqiti programin e Partisë Demokratike të Kosovës (PDK), që synon rikthimin e zhvillimit të kapaciteteve të mbrojtjes, për të cilin tha se është i nevojshëm për anëtarësimin në NATO. Ajo kritikoi Qeverinë Kurti për mosndërtimin e regjimenteve të nevojshme, si regjimenti i helikopterëve dhe Garda Kombëtare, duke argumentuar se është e domosdoshme të krijohen pesë regjimente në rajonet strategjike për të forcuar pozitat e Kosovës në rrugën drejt anëtarësisë në NATO.
Duke u fokusuar në nevojën për modernizimin e sektorit të sigurisë, Kabashi përmendi domosdoshmërinë e ndërtimit të kapaciteteve digjitale për menaxhimin e informacionit në kohë reale. Ajo sugjeroi se rishikimi i sektorit të sigurisë duhet të ndodhë çdo katër vjet dhe se është e rëndësishme për policinë që trajnimi të reflektojë ndryshimet e kohës dhe nevojat aktuale. Siguria shëndetësore dhe jetësore e policëve dhe ushtarëve, sipas saj, është gjithashtu prioritet.
Kabashi shprehu shqetësim për situatën në veri të Kosovës, ku kërkoi integrimin e institucioneve, duke akuzuar Listën Serbe për kontrolle të tepruara dhe duke theksuar se veriu është politizuar për interesa personale. Ajo nënvizoi ndjeshmërinë e qytetarëve ndaj një historie tragjike, e cila vazhdon të ndikojë në perceptimin dhe veprimet e tyre.
Në përfundim, Kabashi shprehu angazhimin e PDK-së për të forcuar sigurinë dhe mbrojtjen e vendit, si dhe për të adresuar shqetësimet e qytetarëve, në mënyrë që të arrihet një stabilitet më i madh në Kosovë.
