Barcelona po shqyrton seriozisht mundësinë e transferimit të mbrojtësit holandez të Manchester City-t, Nathan Aké, gjatë këtij afati kalimtar të dimrit. Sipas gazetarit të ESPN, Ekrem Konur, gjigantët katalanas e shohin 30-vjeçarin si përforcimin ideal për të shtuar eksperiencë, siguri dhe thellësi në repartin e tyre defensiv.
Plani i Barcelonës është të sigurojë shërbimet e Aké përmes një marrëveshjeje huazimi. Kjo lëvizje do t’i lejonte trajnerit Hansi Flick të kishte më shumë opsione në mbrojtje për pjesën vendimtare të sezonit. Megjithatë, Barcelona nuk është e vetmja në garë, pasi interes për lojtarin kanë shfaqur edhe klube të Premier League si Crystal Palace, Fulham dhe West Ham.
Ndonëse nuk ka ende një vendim përfundimtar, mundësia e kalimit të Aké në “Camp Nou” mbetet një opsion real në tryezë. Holandezi ka një kontratë me Manchester City deri në vitin 2027 dhe vlerësohet në treg me rreth 18 milionë euro. Gjatë këtij sezoni, ai është aktivizuar në 13 ndeshje nën urdhrat e Pep Guardiolës, por një largim drejt Spanjës mund t’i ofronte më shumë minuta dhe një rol protagonist.
