Santiago Bernabéu nuk është më thjesht një stadium futbolli, por një makineri e vërtetë financiare që po garanton të ardhmen e Real Madridit. Klubi mbretëror parashikon që gjatë këtij sezoni të kalojë shifrën historike prej 400 milionë eurosh të ardhura vetëm nga shfrytëzimi i stadiumit, duke thyer çdo rekord të mëparshëm.
Sipas parashikimeve të fundit, të ardhurat totale të klubit për këtë sezon pritet të arrijnë në 1.248 miliardë euro, një rritje prej 5% krahasuar me vitin e kaluar. Dy shtyllat kryesore që mbajnë peshën e kësaj pasurie janë marketingu (539.9 milionë euro) dhe operimi i stadiumit (402.5 milionë euro), të cilat së bashku përbëjnë mbi 75% të buxhetit total të klubit.
Më fitimprurës se muzetë: Suksesi i “Tour Bernabéu”
Një nga faktet më befasuese të këtij raporti është fuqia e turit të stadiumit. Klubi vlerëson se të ardhurat nga vizitat turistike në stadium do të rriten me 31% këtë sezon, duke e lënë pas kufirin e 50 milionë eurove. Për ta vendosur në perspektivë, Muzeu i famshëm i Prados në Madrid gjatë vitit 2023 arkëtoi rreth 27 milionë euro – pothuajse gjysmën e asaj që gjeneron vetëm turi i stadiumit të Realit.
Gastronomia dhe jeta luksoze
Përveç futbollit, Bernabéu po kthehet në një pikë referimi për kulinarinë në Madrid. Hapësira të tilla si Bernabéu Market, KŌ by 99 Sushi Bar dhe këndi i Mahou janë kthyer në histori suksesi. Ndërkohë, “perla” e projektit, SkyBar, pritet të hapet së shpejti, duke rritur akoma më shumë vlerën e zonave VIP dhe ekskluzivitetin e stadiumit.
Teknologjia Apple dhe rikthimi i koncerteve
Florentino Pérez po shikon drejt së ardhmes me projekte avangarde:
- Bernabéu Infinito: Një partneritet teknologjik me Apple që do t’u lejojë tifozëve të përjetojnë stadiumin përmes syzeve të realitetit virtual (VR). “Do të jetë si t’ia hapësh dyert e stadiumit të gjithë planetit,” është shprehur presidenti Pérez.
- Izolimi akustik: Klubi po punon intensivisht për izolimin e zërit, në mënyrë që të rinisin koncertet e mëdha pa shqetësuar banorët e lagjes Chamartín.
Me këto lëvizje, Real Madridi po dëshmon se transformimi i stadiumit ishte investimi më i zgjuar i dekadave të fundit, duke e kthyer atë në një burim të ardhurash që punon 365 ditë të vitit, pavarësisht nëse ka ndeshje apo jo.
