Një ndërprerje e energjisë elektrike në San Francisco la 130,000 shtëpi pa energji dhe detyroi operatorin e robotaksive Waymo të pezullonte shërbimet. Makinat pa shofer u bllokuan në semaforë të errët, duke shkaktuar kaos në kryeqytetin kalifornian. Video të postuara në rrjetet sociale treguan makinat Waymo të ndaluara në kryqëzime, duke u dukur të hutuar për mënyrën sesi duhet të vepronin pa sinjalet e trafikut.
Sipas raporteve të mediave, kompania e pronësisë së Alphabet pezulloi shërbimet pas një njoftimi nga zyra e kryetarit të qytetit lidhur me bllokimin që po shkaktonin automjetet e saj. Shërbimi rifilloi të dielën pasdite. Waymo, që e nisi shërbimin e saj të taksive pa shofer në San Francisco në vitin 2023, zotëron rreth 1,000 automjete në qytet. Kompania ka planifikuar zgjerimin e shërbimeve në Europë vitin e ardhshëm, duke filluar me Londrën.
Megjithëse Waymo ka makinat të dizajnuara me bateri për të vazhduar funksionimin në rast humbjeje të rrjetit, shkalla e ndërprerjes për shkak të zjarrit në një nga stacionet e energjisë e bëri që robotaksitë të qëndronin më gjatë se zakonisht në kryqëzime, duke u përpjekur të evalonin situatën. Kompania njoftoi se është e angazhuar për të integruar shpejt mësimet e nxjerra nga ky incident dhe për të ruajtur besimin e komuniteteve që shërben.
Zyrtarët e qytetit njoftuan se nuk kishte incidente të raportuara ose të lënduar si rezultat i ndërprerjes së Waymo. Furnizuesi lokal i energjisë, Pacific Gas and Electric Co. (PG&E), e lidhën këtë ndërprerje me një zjarr në një stacion energjie. Ndërprerja i zuri në errësirë 800,000 banorë për disa orë, me një të tretën e klientëve të ndikuar në pikun e saj. Departamenti i Menaxhimit të Emergjencave në San Francisco njoftoi për “shkëputje të rëndësishme në transport” dhe u kërkoi banorëve të evitonin udhëtimet jo thelbësore, ndërsa energjia u rikthye në shumicën e qytetit nga e diela.
