Rafinha Alcântara ka njoftuar zyrtarisht tërheqjen nga futbolli profesionist këtë të hënë përmes një mesazhi në rrjetet e tij sociale. Braziliani, një produkt i pastër i akademisë prestigjioze “La Masia”, e mbyll karrierën pasi eksperienca e tij e fundit ishte në Katar me skuadrën e Al Arabi, nga e cila u largua në verën e vitit 2024, duke mbetur pa klub që prej asaj kohe.
Mesfushori i jep fund karrierës pasi ishte pjesë e epokës së artë të Barcelonës së Luis Enrique-s, me të cilën fitoi tripletën historike në sezonin 2014/15. Gjatë rrugëtimit të tij në La Liga, ai la gjurmë edhe te Celta Vigo dhe Real Sociedad, ndërsa provoi fatin edhe në klube elitare evropiane si Inter Milan dhe PSG. Megjithatë, karriera e vëllait të vogël të Thiago Alcântara-s u kushtëzua rëndë nga dëmtimet në momente kyçe. Mes viteve 2017 dhe 2019, ai qëndroi jashtë fushave për pothuajse 500 ditë për shkak të këputjes së ligamentit të kryqëzuar të përparmë dhe një dëmtimi në menisk.
Djali i ish-kampionit të botës, Mazinho, u largua përfundimisht nga Barcelona në vitin 2020 për t’u transferuar te PSG, pasi kishte luajtur 90 ndeshje me fanellën katalanase, ku shënoi 12 gola dhe dhuroi 8 asistime. Në Paris ai u aktivizua në 39 takime përpara se të rikthehej në Spanjë te Real Sociedad dhe më pas të mbyllte kapitullin evropian për t’u zhvendosur në kampionatin e Katarit për dy vitet e fundit të karrierës.
Rafinha tërhiqet nga sporti i luajtur me shifra mbresëlënëse: 386 ndeshje zyrtare, 55 gola dhe 46 asistime. Kabineti i tij i trofeve është i jashtëzakonshëm, duke numëruar një titull të Champions League, tre tituj të La Ligës, tre Kupa të Mbretit, dy Superkupa të Spanjës, një Superkupë të UEFA-s, një titull të Ligue 1, një Kupë të Francës, një Superkupë të Francës, një Botëror Klubesh dhe një Kupë të Emirit në Katar.
