Një skandal i ri ka shpërthyer rreth dosjeve të Jeffrey Epstein, pasi një fotografi ku shfaqej Donald Trump u hoq përkohësisht dhe më pas u rikthye në faqen zyrtare të Departamentit të Drejtësisë së SHBA-së (DOJ).
Sipas zëvendësprokurorit Todd Blanche, heqja e fotos ishte një masë paraprake për mbrojtjen e viktimave, ndërsa kritikat për lidhjen e saj me presidentin i cilësoi si “qesharake”.
Blanche sqaroi se fotografia duhej të shqyrtohej përpara se të publikohej sërish dhe këmbënguli se nuk ka asnjë provë që viktimat e Epstein të jenë të përfshira në të.
Megjithatë, polemikat janë shtuar ndjeshëm pas raportimeve se 13 dosje të tjera, nga mijëra dokumente të publikuara së fundmi, janë zhdukur pa asnjë shpjegim zyrtar.
Demokratët në Komitetin e Mbikëqyrjes në Dhomën e Përfaqësuesve kanë ngritur alarmin, duke kërkuar më shumë transparencë dhe duke pyetur hapur: “Çfarë tjetër po fshihet?”.
Sipas tyre, shumë prej materialeve të publikuara, përfshirë fotografi dhe dokumente të lidhura me krimet e Epstein, janë të redaktuara në masë të madhe.
Kryedemokrati Thomas Massie ka shprehur hapur frustrimin e tij për mënyrën se si administrata Trump ka trajtuar këto dosje dhe ka paralajmëruar përpjekje për ngritjen e akuzave ndaj prokurores Pam Bondi për mosrespektim të ligjit.
Dosjet përfshijnë edhe ilustrime dhe përshkrime të ambienteve të lidhura me Epstein, por fytyrat dhe identitetet e shumë personave mbeten të fshehura.
Përplasja politike dhe institucionale për transparencë dhe drejtësi vijon, ndërsa opinioni publik kërkon përgjigje të qarta mbi lidhjet e Epstein me figura të njohura dhe dyshimet për mbulim informacioni.
Ky episod i fundit ka thelluar mosbesimin ndaj institucioneve dhe ka rikthyer në qendër të debatit nevojën për transparencë të plotë dhe drejtësi për viktimat.
