Një 48-vjeçar shqiptar, i njohur në komunitet si Fabio, ka ndërruar jetë pas një aksidenti të rëndë rrugor në autostradën “A1”, në zonën e Calenzanos të Italisë.
Viktima, Fatmir Muslia, ishte shofer kamioni dhe jetonte prej vitesh në Itali, ku kishte fituar respektin e bashkatdhetarëve dhe vendasve për profesionalizmin dhe sjelljen e tij të mirë.
Ngjarja ndodhi kur Muslia, duke drejtuar kamionin e tij, u përplas me një automjet tjetër. Përplasja ishte e fortë dhe fatkeqësisht nuk i la viktimës mundësi shpëtimi.
Menjëherë pas lajmit, miq dhe bashkatdhetarë të tij u mblodhën pranë shtëpisë së tij në Via di Vittorio, një kryqëzim mes Via Firenze-s dhe Via Romana-s, për t’i shprehur ngushëllimet familjes.
Atmosfera ishte e trishtë dhe e mbushur me dhimbje, ndërsa të afërmit dhe fqinjët shprehën pikëllim për humbjen e një njeriu të dashur.
Funerali u zhvillua në varrezat e qytetit Tau, ku mori pjesë një numër i madh qytetarësh dhe miqsh, duke nderuar kujtimin e Fabios.
Fatmiri la pas gruan, Blerinën, dhe dy fëmijët, Fabianon dhe Fabiolën.
Ai kishte jetuar në Itali për rreth njëzet vjet dhe ishte veçanërisht i integruar në Altopascio, duke u bërë pjesë e komunitetit vendas.
Miqtë e tij e përshkruanin si një person të dashur, të sjellshëm dhe gjithmonë të gatshëm për të ndihmuar të tjerët.
“Vinte shpesh në klubet e bilardos dhe ishte gjithmonë i qeshur, i kujdesshëm dhe i respektuar. Një person që gëzonte respekt dhe dashuri nga të gjithë”, thanë miqtë.
Ata shtuan se ai ishte një shofer i vetëpunësuar, zotëronte veturat e tij dhe transportonte mallra për palë të treta, duke udhëtuar shpesh dhe duke treguar përkushtim maksimal në punë.
Humbja e tij ka lënë një boshllëk të madh në jetën e familjes dhe komunitetit.
Për të gjithë ata që e njihnin, Fatmiri do të mbetet një shembull i profesionalizmit, korrektësisë dhe sjelljes së mirë.
