Ilir Proda është drejtori i ri i Policisë së Shtetit.
Emri i tij u konfirmua nga Ministri i Brendshëm, Ervin Hoxha gjatë komunikimit me mediat, pas përfundimit të mbledhjes së qeverisë.
Proda do të zëvendësojë në këtë detyrë Muhamet Rrumbullakun.
Kush është Ilir Proda:
Me një karrierë të gjatë prej 19 vitesh, Ilir Proda, aktualisht mbante postin e drejtorit të Policisë Elbasan. Ai ka nisur hapat në policinë e Shtetit në vitin 2005 fillimisht si specialist i policisë kriminale në komisariatin nr. 3.
Në vitin 2013, Porda u emërua shef komisariatit nr. 2 në Tiranë, detyrë të cilën e mbajti gati një vit dhe dy vite të tjera, deri në vitin 2016 shërbeu si shef i komisariatit të Bulqizës.
Tre vjet më parë, Proda mori gradën kryekomisar dhe u emërua zv.drejtor për hetimin e krimeve në Korçë.
Më pas, po gjatë 2021, ai emërohet në po të njëjtën detyrë në Policinë e Elbasanit. Në Mars të këtij viti ai u emërua në krye të Policisë së Elbasanit.
Komisioni i Posaçëm i dorëzoi në bazë të ligjit Ministrit të Brendshëm listën me 5 kandidatët më të vlerësuar, ndërsa Ministria e Brendshme përzgjidhi Ilir Prodën, si kandidatin më të përshtatshëm për drejtimin e Policisë së Shtetit.
Filtrat që kaluan kandidatët
Komisioni i Posaçëm kreu verifikimin e pastërtisë së figurës për të gjithë kandidatët duke kërkuar të dhënat përkatëse nga organet ligjzbatuese, si vijon: Prokuroria e Posaçme Kundër Korrupsionit dhe Krimit të Organizuar (SPAK), Prokuroria e Përgjithshme, Shërbimi Informativ Shtetëror (SHISH), Drejtoria e Përgjithshme e Policisë së Shtetit (DPPSH), Agjencia e Mbikëqyrjes Policore (AMP), Agjencia e Informacionit të Sigurisë së Mbrojtjes (AISM)./ilirianews
