Departamenti Amerikan i Drejtësisë ka nxjerrë në dritë pjesën e parë të dokumenteve që lidhen me dosjen e Jeffrey Epstein, një publikim i shumëpritur pas miratimit nga Kongresi të ligjit që parashikon hapjen e plotë të materialeve hetimore.
Në këtë fazë të parë, dosjet përfshijnë foto, video dhe raporte hetimore, ku shfaqen edhe emra të njohur të politikës dhe artit botëror, mes tyre ish-presidenti amerikan Bill Clinton, Andrew Mountbatten-Windsor, si edhe figura të famshme të muzikës si Mick Jagger dhe Michael Jackson.
Autoritetet amerikane kanë pranuar se jo të gjitha dokumentet janë publikuar brenda afatit të përcaktuar, ndërsa një pjesë e madhe e materialeve është e redaktuar. Sipas ligjit, redaktimet bëhen për të mbrojtur identitetin e viktimave apo hetime ende aktive, megjithatë arsyetimet për këto ndërhyrje nuk janë bërë ende publike.
Në mesin e fotove të shpërndara janë edhe disa imazhe të Bill Clinton, i fotografuar pranë Epstein në fund të viteve ’90 dhe fillim të viteve 2000. Një zëdhënës i ish-presidentit reagoi duke theksuar se bëhet fjalë për foto shumë të vjetra dhe se Clinton kishte ndërprerë çdo kontakt me Epstein përpara se akuzat të bëheshin publike.
Dosjet përfshijnë gjithashtu dokumente gjyqësore ku përmendet edhe presidenti amerikan Donald Trump. Në to thuhet se Epstein dyshohet se e ka prezantuar Trump me një vajzë 14-vjeçare në Mar-a-Lago në vitet ’90. Megjithatë, në këto dokumente nuk ka akuza të drejtpërdrejta ndaj Trump dhe asnjë nga viktimat e Epstein nuk ka ngritur padi kundër tij. Vetë Trump ka deklaruar më herët se kishte qenë mik me Epstein, por se marrëdhënia e tyre u ndërpre vite përpara arrestimit të financierit.
Sipas Departamentit të Drejtësisë, dokumentet e publikuara deri tani përbëjnë vetëm një pjesë të vogël të arkivit total dhe publikime të tjera priten në vijim.
