Pep Guardiola ka mohuar kategorikisht spekulimet për një largim të afërt nga Manchester City, duke sqaruar se nuk ekziston asnjë plan për t’u larguar nga “Etihad Stadium”.
Gjatë kësaj jave, raportime të ndryshme sugjeronin se trajneri katalanas po përgatitej të mbyllte kapitullin e tij te City në fund të sezonit, pas një dekade suksesi të vazhdueshëm. Madje, trajneri i Chelseat, Enzo Maresca, u përmend si kandidati kryesor për ta zëvendësuar Guardiolën, duke qenë se ka punuar më parë si ndihmës i tij në sezonin e tripletës historike 2022/23.
Megjithatë, Guardiola ka qenë i prerë në reagimin e tij, duke theksuar se i kanë mbetur ende 18 muaj kontratë dhe se nuk po mendon aspak për largimin.
“Tre apo katër vitet e fundit, sa herë që më bëhet kjo pyetje, përgjigjja ime është e njëjtë. Ndoshta një ditë, kur të jem 75 apo 76 vjeç, do të largohem nga City. Por aktualisht kam edhe 18 muaj kontratë dhe jam shumë i lumtur,” u shpreh Guardiola.
Ai shtoi më tej:
“Nuk ka asnjë diskutim. Tema mbyllet këtu. Nuk do të jem i përjetshëm, askush nuk është, por ky diskutim nuk është në tryezë. Çfarë do të ndodhë, do të ndodhë, dhe klubi duhet të jetë i përgatitur për gjithçka.”
Manchester City ka mundësinë që, me një fitore ndaj West Hamit të shtunën, të ngjitet përkohësisht në krye të Premier League, duke kaluar Arsenalin në renditje.
