Bruno Fernandes ka zbuluar një kapitull të vështirë në karrierën e tij te Manchester United, duke pranuar se verën e kaluar klubi ishte i gatshëm ta linte të largohej. Mesfushori portugez tregoi se vendimi për të qëndruar erdhi falë ndërhyrjes së trajnerit Ruben Amorim dhe mbështetjes së familjes së tij.
Në një intervistë për SportWitness, 31-vjeçari rrëfeu se drejtuesit i kishin lënë të kuptonte se largimi i tij nuk do të ishte problem për klubin, gjë që e kishte lënduar thellë. Sipas tij, biseda me trajnerin dhe lidhja emocionale me klubin ishin vendimtare për të mos u larguar nga “Old Trafford”.
“Klubi donte të largohesha verën e kaluar, e mbaj mend shumë mirë. Vendosa të qëndroj pjesërisht për shkak të familjes sime, por edhe sepse e dua këtë klub. Biseda me trajnerin më bindi. Megjithatë, nga klubi ndjeva sikur mesazhi ishte: ‘Nëse largohesh, nuk është ndonjë humbje e madhe’. Kjo më dhembi shumë,” u shpreh Fernandes.
Portugezi shtoi se ndihej i zhgënjyer pasi, sipas tij, gjithmonë ka dhënë maksimumin për fanellën e Unitedit: “Jam gjithmonë gati, luaj në çdo moment, qoftë mirë apo keq. Dhe kur sheh lojtarë të tjerë që nuk e vlerësojnë apo nuk e mbrojnë klubin si ti, është shumë zhgënjyese.”
Bruno Fernandes iu bashkua Manchester United në vitin 2020 nga Sporting Lisbona për 65 milionë euro. Që nga ajo kohë, ai ka zhvilluar 307 ndeshje, ka shënuar 103 gola dhe ka dhënë 93 asistime, duke u shndërruar në një nga liderët kryesorë të “Djajve të Kuq”.
Kontrata e tij aktuale me Manchester United është e vlefshme deri në vitin 2027, ndërsa vlera e tij në treg, sipas Transfermarkt, vlerësohet rreth 40 milionë euro.
