Bjellorusia ka liruar 123 të burgosur, duke përfshirë aktivisten e njohur të opozitës Maria Kolesnikova dhe fituesin e Çmimit Nobel për Paqe, Ales Bialiatski, në një veprim që vjen pas heqjes së disa sanksioneve nga Shtetet e Bashkuara. Lirimet ndodhën pas negociatave në Minsk, ku u takuan autoritetet bjelloruse me John Coale, dërguar special i SHBA-së për Bjellorusinë.
Si pjesë e marrëveshjes, SHBA pranoi të heqë sanksionet mbi eksportin e potasit, një produkt i rëndësishëm për ekonominë e vendit. Coale nënvizoi se heqja e sanksioneve do të vazhdojë me normalizimin e marrëdhënieve dhe e përshkroi lirimin e të burgosurve si një hap pozitiv.
Sipas autoriteteve ukrainase, Kolesnikova dhe 113 të burgosurit e tjerë fillimisht u dërguan në Ukrainë për ndihmë mjekësore, para se të transferoheshin në Poloni dhe Lituani. Një grup më i vogël, që përfshin Bialiatskin, arriti drejtpërdrejt në Vilnius. Motra e Kolesnikovës, Tatiana Khomich, deklaroi se ajo është në gjendje të mirë shëndetësore pas vitesh të jetuara në izolim, duke pohuar se “ajo është e lirë dhe duket mirë” pas një video-thirrjeje.
Svetlana Tikhanovskaya, udhëheqësja e opozitës bjelloruse në mërgim, e quajti marrëveshjen një strategji pragmatike për të përdorur sanksionet si një mjet për të detyruar autoritetet në vend të veprojnë. Ajo theksoi se heqja e sanksioneve mund të rikthehet nëse kushtet e marrëveshjes nuk përmbushen.
Kjo situatë mësohet se vjen në një kontekst të tensionuar për Bjellorusinë, ku autoritetet kanë qenë nën presion për të liruar të burgosurit politikë që nga protestat e vitit 2020. Ndryshe, mundësia që marrëveshja mes SHBA dhe Bjellorusisë të përballet me sfida në të ardhmen mbetet e hapur, në varësi të veprimeve të mëtejshme të autoriteteve bjelloruse.
