Krijuesja e përmbajtjeve për të rritur, Tia Billinger, e njohur si Bonnie Blue, do të dëbohet nga Indonezia. Edhe pse nuk u gjet fajtore për shkelje të ligjeve të rrepta kundër pornografisë, ajo rezultoi se kishte punuar në vend me vizë turistike, duke shkelur rregullat e imigracionit.
26-vjeçarja u ndalua gjatë një operacioni policor në një studio në Bali, ku u shoqëruan 34 persona. Nga hetimet nuk u gjetën prova për prodhim materialesh pornografike, por autoritetet zbuluan se Billinger kishte punuar pa lejet e nevojshme, çka çoi në vendimin për dëbimin e saj.
Ajo u gjobit me 200 mijë rupiah (rreth 12 dollarë) dhe pritet të largohet nga vendi pas mesnatës së sotme. Autoritetet indoneziane njoftuan se po shqyrtojnë kërkesën për ta futur në listën e zezë, duke i ndaluar rikthimin në vend.
Sipas policisë së Badung, dëshmitë e 30 të huajve dhe indonezianëve të tjerë treguan se ndodheshin në studio për xhirimin e një “reality show argëtues”, duke mohuar prodhimin e ndonjë materiali të pahijshëm. Edhe videot e sekuestruara nga një hotel në zonën Berawa nuk përmbanin elementë pornografie.
Megjithatë, pesë të huaj, mes tyre edhe Billinger, dyshohen se kanë “keqpërdorur lejet e qëndrimit” për të krijuar përmbajtje komerciale. Policia tha se po bashkëpunon me prokurorinë dhe imigracionin për hapat e tjerë ligjorë.
Billinger, me origjinë nga Nottingham, njihet për videot e saj të debatueshme dhe udhëtimet në universitete për të xhiruar materiale me të rinj. Vitin e kaluar, asaj iu anulua viza turistike australiane për planet për të prodhuar përmbajtje për të rritur me të rinj mbi moshën ligjore.
