Deputeti i Partisë Demokratike, Belind Këlliçi ka folur mbrëmjen e sotme lidhur me takimet e Ervin Salianjit dhe Ilir Alimehmetit.
I ftuar në një studiu televizive, Këlliçi tha se nuk shqetësohet nga këto sepse në PD prevalon mendimi ndryshe dhe qasja e kundërt, sipas tij ndryshe nga Partia Socialiste.
“Edhe dje më pyetën se çfarë mendimi kisha që Salianji dhe Alimehmeti ishin në foltoren e PD-së. Çfarë mendimi mund të kem që një anëtar Kryesie i PD dhe një anëtar i Këshillit Kombëtar që janë në aktivitetin e partisë së tyre. Është krejt normale. I kam përcjellë të gjitha zhvillimet dhe vijoj të them që ndryshe nga Partia Socialiste, në Partinë Demokratike prevalon mendimi ndryshe, debati, qasja e kundërt. Kur ka debat apo mendim ndryshe në PD, nuk shqetësohem. Do të shqetësohesha po të ishin të gjithë në rresht për një, po të ishin ushtarë, si në PS. Por, më bën përshtypje që edhe zoti Braçe shpreh kritika ndaj kolegëve të mazhorancës, por nuk bëhen emisione për mendimin ndryshe në PS”, shtoi Këlliçi.
