Kryeministri i Kosovës, Albin Kurti, është ftuar të dëshmojë sot në orën 09:30 pranë Prokurorisë Speciale lidhur me një hetim mbi abuzimet me rezervat shtetërore. Rasti ka të bëjë me ministren Rozeta Hajdari dhe biznesmenin Ridvan Muharremi, të cilët dyshohen për shkelje të rënda.
Ftesa për dëshminë e Kurtit i është dërguar më 12 dhjetor, por ende nuk është konfirmuar nëse ai do të paraqitet në Prokurori. Ndërkohë, zëdhënësi i Qeverisë, Përparim Kryeziu ka akuzuar sistemin e drejtësisë për përpjekje për të ndikuar në proceset zgjedhore. Ai e lidh këtë zhvillim me precedentët e mëparshëm, duke përmendur pengesat ligjore që e ndaluan Kurtin të kandidonte në zgjedhjet e vitit 2021 dhe duke sugjeruar se kjo ftesë synon të ndikojë në zgjedhjet e ardhshme të vitit 2025.
Hetimet nisën pas publikimit të disa audio-regjistrimeve në gusht 2024, ku dyshohet se zyrtarë të Ministrisë së Industrisë flasin për mungesën e vajit dhe grurit të kontraktuar nga Polonia për rezervat shtetërore. Pretendohet se këto produkte, megjithëse të paguara nuk kanë mbërritur kurrë në Kosovë.
Ministrja Hajdari dhe biznesmeni Muharremi u arrestuan në lidhje me këtë skandal, ndërsa hetimet ende vazhdojnë.
